Grossä Chinesischä Gartähaag

Liebi Blogläser

Das isch än üsserst konspirativä Biitraag und drum wächsled mir au mit grossem "ÄÄÄÄÄÄH" und "ÖÖÖÖÖÖH" in öisi Gheimsprach Züritüütsch; angeblich heigi s'HR vode chinesische Internetpolizei noch gwüssi Problem bide Rekrutierig vo flüssend Schwiezertüütsch sprechende Agente, mer sind also somit ufde sichere Siite.

Leider händ d'Chinesli vor es paar Wuche de Zuegriff uf öisi (natürli nöd nur öisi, sondern sämtlichi Blogspots) Homepage abgwürgt. Das chunnt da immer mal wieder vor und mer weiss nie würklich wieso; au Youtube (de alti Tibetär im Exil heigi es paar nöii Filmli upgloadet) lauft mittlerwiele nüm und ab und zue wird sogar Google (zwäcks User-Umpolig uf chinesischi Suechdienst) abegfahre, obwohl die ja angeblich Surferdate a d'Chinese uusliefered.

Will die ganz Sach jetzt aber scho e rächts Zietli aaduuret und bereits Reklamatione us öisere Läserschaft cho sind, hämer öis jetzt mal in es paar Häckerfore schlaugmacht. Und voilà: HIER WII GOU ÄGÄN! Proxy sei Dank, chönd mir immerhin wieder nöii Bricht schriebe. Leider glingts öis aber nonig Bildli ufe z'lade. Wänn also öpper en super Tip hät für e Proxypage wo Bilderupload erlaubt, dänn bitte sofort mälde.

Bis glii, euri Undergroundbloggers.